Nadir genetik xəstəliyi olan pasiyent uğurla əməliyyat olunub

“Von Hippel-Lindau sindromu” nadir görülən genetik xəstəlikdir. Adətən, 20 yaşdan sonra özünü büruzə verir. Torlu qişa, beyincik, onurğa beyni, böyrəküstü vəzdə hemangioblastomalar inkişaf edir. Torlu qişaya və mərkəzi sinir sisteminə qansızmalar və artmış təzyiq əlamətləri aşkarlanır.

Respublika Müalicəvi Diaqnostika Mərkəzinə (RMDM) müraciət edən 23 yaşlı pasiyentin hər iki gözündə torlu qişanın qopması aşkarlanıb və RMDM-in VitreoRetinal Göz cərrahı, tibb üzrə elmlər doktoru Tural Qəlbinur tərəfindən bir neçə uğurlu əməliyyat edilib və görməsi bərpa edilib.

Növbəti əməliyyat RMDM-in neyrocərrahı Azər Əkbərov tərəfindən edilib. Dr. Azər Əkbərov: “Şiddətli boyun ağrıları səbəbi ilə çəkilən MRT-də onurğa beynin önündə yer almış və ciddi ödemə səbəb olan törəmə (hemangioblastoma) aşkarlandı. Hemangioblastomanın onurğa beyninin önündə yer alması olduqca nadirdir (1-2%) və əməliyyatı olduqca çətin və risklidir. Dünya ədəbiyyatında az sayda bu cür əməliyyat yayınlanıb. Pasiyentə dördüncü və beşinci boyun fəqərələrinin xaric edilməsi, törəmənin mikroskopik çıxarılması, expandable cage və plak vida sistemi ilə rekonstruksiya əməliyyatı icra edilib. Əməliyyatdan sonra heç bir nevrolojik qüsur izlənilməyib və 5 gün sonra yeriyərək evinə yazılıb. Bu çətin işdə RMDM-in bütün kollektivinə, xüsusilə endokrinoloq Xəyyam Eyvazova, invaziv radioloq Ağakişi Yəhyayevə, Anesteziologiya və reanimasiya şöbəsinin müdiri Araz Süleymanova, qastroenteroloq-hepatoloq Cəmil Kamilliyə, ümumi cərrah Emin Əmiraslanova sonsuz minnətdarlığımı bildirirəm!”